Meiri eða minni drykkjulæti

Fréttir í dag greindu frá því að lögreglan hefði fengið liðsauka á næturvakt í miðbænum.  Það voru borgarfulltrúar Samfylkingarinnar Dagur Eggertsson og Oddný Sturludóttir sem stóðu vaktina með laganna vörðum í nótt.

Menn bjartsýnir telja að bætur
í borginni verði, ef gætur
lýðnum þar gefur
löggan og hefur
Dag þar um dimmar nætur.

Vonandi að þetta verði til bóta.

Annars var í dag haldinn hátíðlegur afmælisdagur hjá vinsælu safni fyrir norðan.

Víst menn í geði það gleður safn
þótt ég geti' ekki farið þess meður nafn.
Afmælisdag
mun eiga í dag
hið reista og vinsæla reðursafn.

Hér vísa ég til þess að safnið mun heita Reðasafnið en ekki Reðursafnið eins og ég hef alltaf haldið.  Verð þó að gera þá játningu að ég hef ekki enn komið því í verk að skoða þetta merka safn.

 

Athugasemdir

[Hallmundur Kristinsson, 25.8.2007 kl. 23:02]

Sama segi ég, alltaf heyrt talað  um Reðursafnið. Svo virðist sem bæði nöfnin hafi verið í gangi, Google gefur fullt af greinum á þau bæði.

[Magister Cat (IP-tala skráð) 26.8.2007 kl. 20:22]

Er þetta ekki bara einfaldleikinn í öllu sínu veldi:

Reðursafn:eintala,safn með einn reður þá væntanlega...Reðasafn: fleirtala,safn með fleirum en einum eða þannig...