Jóladagspæling

Það var eitthvað kunnuglegt við það að vakna á jóladagsmorgun, kveikja á útvarpinu og fá Davíð beint í æð.  Ekki Geir, ekki Ólaf Ragnar heldur Davíð alveg eins og hér áður fyrr.  Það var létt yfir honum, sjálfsagt kátur yfir því að drengurinn er kominn í góða framtíðarstöðu og hann lét vel af sér og sínum í Bankanum.

Hann Davíð er lipur og laginn
og ljóst að allt gengur í haginn:
Aftur sem fyrr
útvarpið spyr

hann álits á jóladaginn.

Útvarpið spurði biskupinn hinsvegar einskis en Mogginn hafði eftir honum að hann væri að hugleiða hlutskipti Jósefs þessa dagana undir fyrirsögninni "Mér er hann Jósef eitthvað svo hugstæður í seinni tíð".

Ég verð nú að segja að ég er nú ánægð með að herra Karl skuli ekki líta stærra á sig en sem svo að vera að velta fyrir sér þessum statista jólaguðspjallsins sem ég tel reyndar að bæði hann og aðrir mættu fullsæmdir af að líkjast. 

Í myrkrinu litið  ég ljós hef
og ljóst er að teldi ég hrós ef
svipmótið bæri
og svipaður væri
jarðneska föðurnum Jósef.

Athugasemdir

[Heimir Lárusson Fjeldsted, 28.12.2007 kl. 01:39]

Eftir að hlusta á predikun Karls á aðfangadagskvöld mun ég alltaf sjá þá báða fyrir mér við samskonar aðstæður og bara 2007 ár á milli.

Takk fyrir liprar limrur.