Linfrómur og afstæður?

Það er ekki ofsögum sagt af Árna Johnsen.  Nú guggnaði hann á því að fara í mál við Agnesi Bragadóttur og sendir frá sér tilkynningu þar sem hann "fyrirgefur henni" um leið og hann atar hana auri sem mest hann má. 
Frasarnir sem hann notar í pistli sínum virðast að mestu heimasmíðaðir eins og það að segja að Agnes hafi verið "linfróm í mannasiðum" og hún eigi "brjóstgóða takta þannig að hennar svið er vítt og vinalegt á margan hátt þótt slíkt sé alltaf afstætt í stærðum".  Þetta minnir mest á tæknilegu mistökin frá því jarðvegsdúkurinn skrapp óvart um borð í Herjólf hér um árið.

En það verður gaman að spjalla um þetta í kaffinu í fyrramálið.

Þjóðina karl hefur kætt
í kaffinu‘ á morgun mun rætt;
hvað hann á við
með „vinalegt svið
sem af-  er í stærðunum –stætt“

Ég held nú samt að hann hafi farið yfir strikið núna?

Ljóst er að skriplar á skötu
er skíthroði eys upp úr fötu
hinn linfrómi  Árni
þó ljóslega sárni
og líkist helst bilaðri plötu.

Eða kannski tekst honum í eitt skipti að þagga niðrí þeim sem ekki eru búnir að gleyma jarðvegsdúknum og muna ekki eftir syndakvittuninni sem hann gengur með upp á vasann....

Skyldi nú verða loks værð um
vafagemsann sem kærðum
við okkur lítt um
löngum og víttum
sem af- er þó –stætt eftir stærðum?

Athugasemdir

[baun, aka Beta fyrrverandi svilkona (IP-tala skráð) 15.9.2008 kl. 19:57]

haha, ég gúgglaði "linfrómur" og lenti á þessari sallafínu síðu!

skemmtilegt, fæ að bæta þér inn á tenglalistann minn, nema þú mótmælir kröftuglega og í bundnu máli

[Jóna Guðmundsdóttir, 15.9.2008 kl. 23:01]

Sæl Beta mín.
Auðvitað er mér heiður að því að vera á tenglalistanum þínum.  Ég skoðaði þína síðu og sé að þú ert í góðum gír sem fyrr.