Á lokametrunum

Vondar fréttir eru orðnar svo alvanalegar í fjölmiðlum að maður þorir varla að vona að morgundagurinn beri í skauti sér gleðifrétt.  Þar er ég auðvitað að hugsa um kosningarnar í henni Ameríku fyrir vestan.

Kosningakannanir  telja að Obama sé öruggur sigurvegari en ég þori ekki að trúa því fyrr en fulltalið verður í Flórida.  Það hefur komið illa við mig síðustu daga þegar spekúlantar spá í þann möguleika að hvítir kjósendur guggni á að velja svartan mann þegar þeir eru staddir  í einrúmi kjörklefans.  Vonandi er það nú bara bull og vonandi verður Obama kosinn með glæsibrag í nótt.

Mér er auðvitað alls ekki sama
en óttast að stefni í drama
ef á hólminum frjósa
og hvítan mann kjósa
þeir sem kokhraustir studdu Obama.

Ég held ég ráði samt ekki við að vaka í nótt - mér þykir of gott að sofa.

Athugasemdir

[Ari Guðmar Hallgrímsson, 5.11.2008 kl. 20:42]

Það er greinilegt að þér var óhætt að halla þér. Þetta var glæsilegur sigur. Og eitt er víst að hann getur aldrei orðið lakari  heldur en fráfarandi forseti.

Kveðja