Sögustund

 Aldrei hef ég lært latínu en kann þó örfá orð,  Eitt þeirra er pereat sem mun þýða "farist hann" eða kannski aðeins mildara "niður með hann".  Þetta hrópuðu skólapiltar Lærða skólans þegar Sveinbjörn Egilsson rektor vildi skylda þá til að ganga í bindindisfélag.  Það tókst hjá þeim - þeir losnuðu við kallinn og félagið líka minnir mig.

Sem kunnugt er endurtekur sagan sig og í gær eða fyrradag fóru nokkur ungmenni (og Jón Gerald) inn í Landsbankann í Reykjavík og hrópuðu niður með Tryggva Jónsson, sem var jú einn af þeim svæsnustu í útrásinni. Hann var hinsvegar kominn sæll og glaður á ríkisjötuna með fast starf í hinum nýja banka.  En ekki lengur því hann var hrópaður niður og hætti í kjölfarið. 

Pereat iðka menn enn um sinn;
æstur fór múgur í bankann inn.
Tryggvi varð mæddur
og trúlega hræddur
því tekið  hann hefur nú pokann sinn.

Svo er bara að vona að hópurinn drífi sig upp í Seðlabanka með viðkomu í Stjórnarráðinu.

Athugasemdir

[Erlingur Nielsson (IP-tala skráð) 21.12.2008 kl. 18:33]

Sæl og blessuð Jóna! Gaman að lesa limrurnar þínar. Fékk bókina þína líka senda frá Íslandi. Til hamingju með hana. Var í allan morgun að lesa og skemmti mér konunglega.

Ég hef aldrei fengist við limrusmíðar, en eftir allan lesturinn í morgun varð til ein. Mér hefur verið svo mikið hugsað til allra mótmælanna á Íslandi. Ekki svo auðvelt að botna í þeim öllum. Til dæmis þegar Bubbi stóð fremstur í flokki á Austurvelli sem talsmaður lítilmagnans. Ég sá hann meira fyrir mér í bílaauglýsingum þar sem hann var að reyna að fá almúgann til að fá sér bíl á 100% láni. Því varð þetta til:

Á Austurvelli voru mótmæli há og hvell

þar harmaði Bubbi mikinn skuldaskell

Þetta er agaleg kreppa

fyrir okkur á jeppa

á útlendu bílaláni frá B&L.

Kveðja, Elli.

[Jóna Guðmundsdóttir, 21.12.2008 kl. 21:26]

Sæll Elli

Gaman að heyra frá þér og frábært að þú sért kominn í limrugerðarflokkinn. 

Sammála þér að mér finnst Bubbi lítið trúverðugur mótmælandi.  Hann mun vera kominn á mála hjá Toyota og keyrir núna Land Cruiser (Grand Looser) í boði umboðsins ef marka má íslensku blöðin.

Bið að heilsa öllum - geri ráð fyrir að allir séu heima um jólin?

[Erlingur Nielsson (IP-tala skráð) 24.12.2008 kl. 12:49]

Sæl Jóna. Jú, mikið rétt, allir heima um jólin. Óska ykkur öllum gleðilegra jóla!