Íslenskur kokkáll

Það var frétt í Mogganum í gær um reiðan Íslending sem sá svo á eftir sambýliskonunni í hendurnar á einhverjum Bauna að hann brá sér af bæ til að taka í lurginn á honum.

Það var ergelsi og gasaleg gremja
sem greyinu tókst ekki‘ að hemja:
Hann keypti sér rör
og réðst svo í för
til Danmerkur delann að lemja.

Það fylgdi fréttinn að með í för var 18 ára sonur mannsins - lærdómsrík og gefandi feðgaferð.

Afskriftir

Nú kom að því.  Eftir að Villi er búinn að liggja undir feldi í viku eða tvær og allir borgarstjórnarfulltrúar búnir að lýsa því yfir að þeir séu tilbúnir að gefa honum andrými eftir þörfum tók Geir af skarið:  Hann gaf honum viku!

Nú ljósið svo grænt hefur Geir
gefið og stendur ei meir
en vika til boða
Villa að skoða
hvort ætli á Skjól eða Eir.

Limruleti

Ekki er við Ólaf borgarstjóra að sakast þó ég nenni ekki að blogga.  Hann gefur alveg færi á skemmtilegum pælingum.  Það var tildæmis óborganlegt að sjá hann veita verðlaun í hönnunarsamkeppni um byggð á flugvallarsvæðinu hafandi komist til valda í þeim einum tilgangi að koma í veg fyrir þá sömu byggð.  Þegar hann sagði svo að víst mætti byggja í útjöðrunum og halda vellinum fóru menn að efast um geðheilsu hans.

Hann trúir því stöðugt hann stýri
en stórt er nú hugsað  í mýri:
Á vellinum byggja
vinir hans hyggja
og úti er brátt æfintýri.

Villi vinur hans er líka stöðugt í skotlínu fjölmiðlanna og ekki bara fjölmiðla.  Nú spái ég því að  hans eigin flokksmenn teknir að hamast gegn honum.  Bjarni Benediktsson reið á vaðið í morgun og sagði sína skoðun.  Reyndar ekki bara á honum heldur gungunum í kringum hann sem þora hvorki að segja af eða á og "styðja hann meðan hann er oddviti"...bla, bla....

Fátt er nú Villa til varna
og víst fer á dalnum að harðna
Friðurinn rofinn
og flokkurinn klofinn
fannst mér að heyra á Bjarna.

Vitlausari en við

Það gleður alltaf hjarta Frónbúans þegar í ljós kemur að einhverjir eru vitlausari en við.  Fréttin um sænsku konuna sem vildi ekki selja lesbíu hund er þannig frétt. 

Það er bagalegt segi ég  bara
því blótsyrði kýs ég að spara.
En samt er ég hlessa,
ef sænskættuð lessa
í hundana fær ekki‘ að fara.

Yfirvöld í Svíþjóð sektuðu reyndar hundasölukonuna.  Við hefðum boðið henni að gerast borgarstjóri.

Tíðindalaust af vesturvígstöðvunum

Slæmt GSM-samband hefur ríkt við borgarstjórnarflokk sjálfstæðismanna þessa síðustu daga.  Allir með slökkt á símunum?  Reyndar kom Júlíus Vífill fram í dagsljósið um síðir en gæti átt eftir að óska þess á morgun að hafa sleppt því ef  í ljós kemur að hann hefur veðjað á rangan hest. 

Yfirstjórn flokksins og agi
enn kann að vera í lagi
en líklegt þó er
það leikmaður sér
að til tíðinda í dögun þar dragi.

 

Grátkonur

Skýrsla eða ekki - mistök eða ekki - umboð eða ekki - hann situr sem fastast.  Villi reyndi að svara fyrir REI-skýrsluna í kvöld og varð einu sinni sem oftar margsaga.  Þegar allt um þraut reyndi hann að bregða á ráð Björns Inga og bresta í grát en það var bara aumkunnarvert kjökur og honum varla til framdráttar.

Hann langdreginn lopann teygði
en í lokin svo af hann beygði.
Við hæfi nú væri
að Vilhjálmur færi
og af loksins sér hann segði.

Trikkið hjá Birni það tókst

og töluvert fylgi hans jókst
en einungis hlátur
uppsker nú grátur
Villa, er skalf bæði og skókst.

Rottur hér og þar

Það var skemmtilegt innslag á vefsjónvarpi mbl um rottuát í Taiwan sem hefur aukist mjög nú á þessu ári rottunnar samkvæmt kínversku tímatali.  Máltíðin leit lokkandi út og ég hefði alveg verið til í að borða steikta eldisrottu með basil, chili og engifer eins og sagt var að væri í uppskriftinni.

Þeir rottur með húð og hári
hesthúsa á þessu ári
austur í Taiwan

svo elti þá gæfan
og fríi þá trega og tári.

Rotturnar hér hjá okkur eru hinsvegar í pólitík.  REI-skýrslan lak í fjölmiðla í kvöld og í úttekt Kastljóss á málinu kom skýrt fram að auðvitað vissi Villi allt, alltaf. 

Allflestir segja nú svei
við sukkinu er kennt er við REI.
Nú stutt er  til loka
og líklega poka
sinn Villi má grípa – það grey.

Eða hvað - í staðinn fyrir að éta rotturnar hér gefum við þeim annan séns?

Ein sérsveitin enn?

Í Silfri Egils í dag tók general Bjarnason enn eina ferðina að ræða drauma sína um varalið.  Nú er bara að vona að aurar ráðuneytisins klárist áður en þetta bull verður að veruleika. 

Í auðmýkt nú þess ég bara bið
að Bjarnason þurfi að spara við
sig, og því plís
hann setji á ís
plön um hið vopnaða varalið.

Ruglað lið

Ekki ríður Óli F. feitum hesti frá fyrstu skoðanakönnun sem gerð er á fylgi við hann sem borgarstjóra.  Aðeins 16% segjast styðja hann í því embætti og litlu fleiri (jæja 27%) styðja nýjan meirihluta. 

Styðja hann innan við einn af sex
og augljóst að fylgi hans lítið vex:
Flestallir  vilja
sem fyrst við hann skilja
því fýrinn  mun -ruglaður vera kex-.

Lán í óláni

Fyrir flughrædda var ekki gaman að lesa um flugdólginn sem var fluttur í böndum úr flugvél eftir að henni hafði verið lent á Írlandi.  Sérlega var þetta erfitt þar sem flugdólgurinn hafði hlutverk í ferðinni - hann var nefninlega flugmaður vélarinnar. 

Ljóst mun að lífshættu skapaði
og lán er að þota´ekki hrapaði
á flugi í gær
er flugmaður ær

gerðist og glórunni tapaði.

En sem sagt.  Þetta fór vel.  Vélin sem var á leið frá Kanada til London lenti á Írlandi þar sem flugmaðurinn var settur af.