Af Strandamönnum

Jólamaturinn í ár?  Veit ekki en spennandi nýjungar af Ströndum voru kynntar í grein í mbl. í dag.  Þar eru bændur farnir að meðhöndla ærkjöt á sérstakan hátt og selja undir heitinu lostalengjur.  Eða eins og segir í fréttinni:

"Á bænum Húsavík við Steingrímsfjörð hafa hjónin Hafdís Sturlaugsdóttir og Matthías Lýðsson hafið kynningarframleiðslu á svokölluðum Lostalengjum, sem eru unnar úr aðalbláberjalegnum og taðreyktum ærvöðvum".

Úr bláberjum kryddlög þar blanda menn
og til boða mun landsmönnum standa senn
ærkjöt sem losta
kveikir því  kosta-
ríkt kjötið þeir framleiða  Strandamenn

Nú er bara að sjá hvort framleiðslan stendur undir væntingum.

Það sem skiptir máli í boltanum

Höfðatölurökin voru ekki notuð til að réttlæta tapleik í fótbolta gegn Dönum í kvöld og er það nú vel.  Hinsvegar sagði nýr þjálfari að þetta væri í lagi því hugarfarið hefði verið gott.  Loksins kom maður sem skilur að það skiptir máli að vera með - ekki að vinna.

Hann  Óli er líklegast lúinn
enda leikurinn nokkuð snúinn:
Þó heldur sé veikt
holdið og steikt
er hugurinn reiðubúinn.

Gott mál

Það er gott mál að kalla hlutina sínum réttu nöfnum.  Nú vill Steinunn Valdís að ráðherrar hætti að heita ráðherrar og fari að heita eitthvað sem er ekki eins kynbundið.  Spennandi verður að sjá hvaða viðtökur sú tillaga fær í meðförum alþingis og ráðherra.

Hlustirnar spennt við ég sperrti
er spekingsleg Steinunn sig herti:
Alþingis-kallar
og –konurnar allar
eru kostuleg  merkikerti.

Er ekki bara merkikerti ágætt orð yfir ráðherra:  "Hæstvirt menntamálamerkikerti" hljómar ekki illa.

Annað merkikerti sem kveður að þessa dagana er Kári Stefánsson sem nú ætlar að plokka af þjóðinni aura fyrir að segja fólki að það geti fengið snert af fótaóeirð einhverntíma á lífsleiðinni.  Þeir sem ekki studdu DeCode með hlutabréfakaupum hér um árið geta nú látið sitt af hendi rakna við málstaðinn.

Um ágóðann almenning svíkur
og enginn af bréfum varð ríkur
samt  aura af trú-
gjörnum innheimtir nú
já „engum hann er Kári líkur“.

En reyndar má nú minna á að það voru verðbréfaguttar sem töluðu hlutabréf inná fólk - ekki Kári.

Dómadags vitleysa

Austur í Rússíá hafa meðlimir í sértrúarsöfnuði grafið sig lifandi til að lifa af dómsdag.  Sá merki dagur mun renna upp í apríl og þangað til ætlar hópurinn að bíða í gröf sinni og rísa síðan upp á efsta degi.  

Ef lífinu líkur með hvelli
mun ljóst vera‘  að halda þá velli
þeir kláru sem hafa
sig kosið að grafa
í dimman og daunillan helli.

Eiginlega er bara eitt á hreinu.  Ef dómsdagur verður í apríl vil ég frekar farast með ykkur hinum en verða eftir með Rússunum.

Saga handa börnum

Það er ljótt að hafa ofbeldi í flimtingum en freistandi er að láta sér detta í hug að vopnaðir menn í hverfisbúðinni Sunnuhlíð í morgun hafi bara verið að búa sig undir að mæta verðhækkunum.

Þeir bjuggust við röfli og rexi
yfir rándýru sælgæti´ og kexi
og höfðu til vara
ef í hart skyldi fara
tvær kylfur og ágætis exi.

Í frétt frá Kína segir frá konu sem er bara  með hálfan heila en spjarar sig samt ekkert síður en við hin.  Mér datt strax í hug fræg saga Svövu Jakobsdóttur sem mig minnir að heiti "Saga handa börnum" en þar kemur einmitt heilalaus kona við sögu. 

Nú kemur hún við engum vörnum
menn vilja‘ hana rannsaka í törnum.
En ljóst þykir mér
að mætt sé nú hér
mamman úr „Sögu‘ handa börnum“

Enginn er eyland

Það var stórmerkileg frétt um sameiningu sveitarfélaga í mbl í kvöld.  Grímseyingar vilja sameinast Akureyri!   Ég veit ekki til hvers en varla er hugmyndinn um að reka saman strætó eða samnýta sorpbílana?

Þó Grímsey í nepjunni norpi
rétt norður af Glerárþorpi
líklega verður
varla þó gerður
sáttmáli um hirðingu‘ á sorpi.

En þetta er örstutt - aðeins fimm tíma sigling eða svo.

Fláttskapur

Í fréttum uppá síðkastið kemur Veðurstofa Íslands af og til við sögu.  Þar er ástand víst ekki gott og starfsandinn á sumum deildum ekki til eftirbreytni.  Menn eru sagðir leggja hvern annan í einelti og ljótt er ef satt er:

Í veðurstöð  flærða  og flátta
fólkið er stöðugt að þrátta.
Í einelti  lagðir
eru menn sagðir
enda napurt og norðvestan átta*.

*Vindstig en ekki m/sek.

Hnípin þjóð í vanda

Í gærmorgun vaknaði þjóðin með forsætisráðherra í eyrunum.  Hann útskýrði fyrir okkur að við ættum að halda að okkur höndum á komandi mánuðum.  Draga úr neyslu, hætta fasteignabraski og yfirleitt haga okkur öðruvísi en við erum vön.

Mér fannst þetta nú ekki sérlega merkileg ræða og hlustaði bara með öðru eyranu.  Hinsvegar hef ég komist að því í dag að það eru ótrúlega margir sem taka hann alvarlega.  Vinnufélagi blessaði lánið að hafa ekki fengið íbúðina sem hún bauð í fyrir viku og maður í ræktinni lýsti fjálglega fyrir einkaþjálfara sínum hvernig hann ætlaði að brúa bilið fram á mitt næsta ár þegar vextir ættu að lækka aftur.

Þó vaxtakjör valdi hér hryggð
og verðbólgan æði um byggð
blómstra þó  enn
alþingismenn
enda eftirlaun þingmanna tryggð.

Gott að einhverjir horfa fram á bjartari tíma!

Suðurnesjamenn

Gaman að fylgjast með Suðurnesjamönnum þessa dagana.  Þeir hafa í hótunum við Landsvirkjun og landsmenn og vilja ekki að orkan sem beisluð er í þeirra umdæmi fari úr héraði.  Ný og skemmtileg stefna og verður gaman að fylgjast með þeim meina okkur aðgang að Bláa lóninu og hætta að senda krakkana sína til Reykjavíkur í skóla.

Af stöðugri  áfergju  ota
menn ótrauðir fram sínum tota:
Suður með sjó
segja þeir nóg
af orku til einkanota.

Ég vaknaði annars við útvarpið í morgun.  Eða vaknaði er nú ofsagt.  Ég mókti undir löngu og áhugaverðu viðtali við mann sem var vel máli farinn þangað til hann sagði "ég aldist upp úti á landi".  Ég sem líka ólst upp úti á landi hrökk svo illa upp að um meiri svefn var ekki að ræða - ég dreif mig í spjarirnar.

Viðmælandinn hann valdist
vel , en hlustandinn kvaldist
þegar hann sagði
þungur í bragði:
Í þorpinu upp ég  „aldist“.

Í skessuleik

Ef konur eru skeleggar og skörulegar er það notað á móti þeim.  Orð um röggsamar konur eru öllu ljótari en þau sem höfð eru um karla með svipaða eiginleika.  Þær eru frekjur, breddur, nornir og skessur meðan karlarnir eru ákveðnir og láta engan eiga neitt hjá sér.

Ort um mann sem kallaði kvenkyns andstæðing sinn skessu fyrr í dag:

Hann langar að kalla‘ hana lessu
og lemja helst vill í klessu
en hálfum með huga
hann lætur duga
að kalla skörunginn skessu.

Ljót orð um konur eru ófá og hér er vísa um það.  Þetta er reyndar ekki limra en ég  læt hana flakka - hún er ekki ný:

Tæfa, mella, drusla, drós
dula, hóra, skækja.
Flenna, gæra, frekjudós,
frilla, gála, dækja.